Կապանցի խելոքները))))

  Սիրելի, շատ սիրելի կապանցինե'ր, կրկին ողջույն երկար դադարից հետո:
  Հիանալի նորություններ ունենք: Սկսենք մեզ բոլորիս շատ սիրելի Դպրոցականների առարկայական օլիմպիադայից:

  Ըստ իս` Կապանը հիանալի հանդես եկավ 2011-2012 ուստարվա օլիմպիադային: Սյունիքի մարզից ունենք 98 հանրապետական փուլի մասնակից. կարող ենք հպարտանալ որպես սյունեցի: Բայց առավել պետք է հպարտանանք որպես կապանցի, քանի որ 98-ից 45-ը կապանցի շնորհալի երեխաներն են:
  Սյունիքի մարզպետ Սուրեն Խաչատրյանը ոգևորեց մասնակիցներին դրամական պարգևներով. 1-ին տեղ` 10000 դրամ, 2-րդ տեղ` 7000 դրամ, 3-րդ տեղ` 5000 դրամ, իսկ երեք և ավելի 1-ին տեղ գրաված աշակերտներին` լրացուցիչ 100 ամերիկյան դոլար խրախուսանք: Մարզպետը հոգաց նաև հանրապետական փուլին մեկնող աշակերտների ճանապարհի գումարները: Նաև խոստացավ, որ հանրապետական փուլում բարձր արդյունքներ ցուցաբերած աշակերտները կարժանանան հատուկ նվերների:

  Այնպես որ, սիրելի' մեծահասակներ, հպարտացե'ք մեզնով, ոգևորե'ք մեզ, և մենք, հավատացե'ք, դեռ շատ առիթներ կտանք` մեզնով կրկնակի հպարտանալու:

  

Ախ, այս ճանապարհները…

Սիրելի՛ կապանցիներ,մի քանի օր է, ինչ գեղեցիկ ձյուն է տեղում: Բայց այն խնդիրներ է առաջացնում թե՛  հետիոտների, թե՛ վարորդների մոտ: 

 Միայն այսօր, ձյունապատ ճանապարհների պատճառով, մեր փոքրիկ քաղաքում տեղի են ունեցել շատ ավտովթարներ, որոնցից են` Մ.Հարությունյան, Ս. Շահումյան, Ռ. Մինասյան փողոցներինը: Ընդ որում, Ռ.Մինասյան փողոցի վրա իրար են բախվել միանգամից 3 մեքենա:

Հայտնի է նաև, որԵրևան-Կապան մայրուղին նույնպես վատ վիճակում է և շատ դժվարանցանելի բքի, մառախուղի պատճառով: Նույնիսկ որոշ ճանապարհահատվածներում(հատկապես Գորիսի շրջանում) մեքենաները տեղաշարժվում են ճանապարհը սպասարկողների օգնությամբ.տեղ-տեղ առկա է մերկասառույց:

Հարգելի՛ վարորդներ,եղե՛ք ուշադիր: Իսկ դուք` սիրելի՛ անցորդներ,զգույշ անցեք փողոցը: Փորձենք զերծ մնալ դժբախտ պատահարներից:

 Բարի երթ:

Շնորհավորհում ենք Հայոց բանակի 20-ամյակը

                                     

  Հայոց ազգային բանակը ծնունդ առավ 20-րդ դարի վերջին. 1988թ. փետրվարի 20-ը դարձավ սկզբնակետը և մեկնարկը թե՛ ազգային պետականության վերականգնման, թե՛ ազգային ինքնուրույն բանակի ստեղծման համար:

  1992թ. հունվարի 28-ին Կառավարությունը ընդունեց «Հայաստանի Հանրապետության Պաշտպանության նախարարության մասին» պատմական որոշում` դրանով իսկ իրավականորեն ազդարարելով Հայոց Ազգային բանակի ստեղծումը:

  Այսօր արդեն Հայոց բանակը 20 տարեկան է: Այս տարիների ընթացքում այն բավականին կայացել է և հիմա հեշտությամբ է լուծում այնպիսի խնդիրները, որոնք առաջ դժվարանցանելի էին:

  Կապանում նույնպես անցկացվեցին մի շարք միջոցառումներ այս կապակցությամբ:

  N1 և N2 հիմնական դպրոցի աշակերտները այցելել էին Կապանի 54 122 զորամաս` շնորհավորհելու ծառայողներին: Նրանք հայրենասիրական ոգով արտասանում էին հայրենիքին նվիրված խոսքեր: Դահլիճը լիքն էր զինվորներով, ովքեր մեծ ուրախությամբ էին դիտում կազմակերպված միջոցառումը: Երեխաները երգեցին հայրենասիրական երգեր: Անգամ պարեցին:

  Զինծառայողները նույնպես փոքրիկ մշակութային ելույթ էին պատրաստել ի պատասխան դպրոցականների ելույթին: Նրանք ներկայացան մի խումբ երաժշտական և ասմունքի կատարումներով` զարմացնելով թե՛ սպայական կազմին, թե՛ հյուրերին:

 

 Միջոցառմանը հաջորդեց փոքրիկ էքսկուրսիան զորամասով:

ՀԱՅՐԵՆԻՔՍ ԵՍ ԵՄ, ԸՆՏԱՆԻՔՍ, ՄԱՅՐԵՆԻՍ, ԱԶԳՍ ԵՎ ԱՅՆ ՏԱՐԱԾՔՆԵՐԸ, ՈՒՐ ԿՀԱՍՑՆԵՄ ԻՄ ԶԵՆՔԻ ՓԱՌՔԸ:

  

  Կապանի քաղաքապետարանի մշակույթի կենտրոնում նույնպես միջոցառում էր կազմակերպվել: Սկզբում կայացավ զինվորական նիստը, հետո սկսվեց համերգային ծրագիրը:

Աշակերտների անսպասելի ցույցը…

Այսօր Կապանի N2 ավագ դպրոցի աշակերտները, որոնց այժմ հյուրընկալել է N6 հիմնական դպրոցը, անսպասելի ցույց էին կազմակերպել: Գրեթե բոլոր դասարանները դուրս էին եկել դպրոցից և, բակում հավաքված, գոչ էին անում` “Ո՛չ ցրտին”:

 Ոչ ոք գոհ չէ դասասենյակների ջեռուցումից: N2-ի տնօրենի խոսքերով` <<…երեխաներն ուղղակի սովորել են տաք դասարաններին, և այժմ նրանց համար անսովոր է նման ցածր ջերմաստիճանը: Սակայն սա ընդամենը ժամանակավոր խնդիր է. արդեն արվում են անհրաժեշտ ձեռնարկումները>>:

Բայց աշակերտներին այս պատասխանը, ինչպես երևում է, չի բավարարում. ձմեռը վաղուց սկսվել է, և հիմա արդեն ուշ է խոստումների համար, քանի որ նախկին խոստումները չեն իրականացվել: Մյուս կողմից` դպրոցի տնօրինությունը բացասաբար չէ  վերաբերվում երեխաների` բողոքի այս ձևին` ասելով, որ նրանք ընտրել են իրավունքների համար պայքարի ժողովրդավարական ուղին: 

Հիշեցնենք, որ Կապանի N2 ավագ դպրոցի շենքը այժմ վերակառուցվում է: Բայց արդյո՞ք այդ աշխատանքները կհասնեն իրենց ավարտին, և արդյո՞ք այդ շենքը կկոչվի “Կապանի N2 ավագ դպրոց”. ոչ ոք ստույգ չգիտի: Մարզային և հանրապետական  կառավարության ներկայացուցիչների խոսքերը արդեն վստահություն չեն ներշնչում, իսկ աշակերտները չեն բավարարվում ուղղակի խոսքերով:

Ինչևէ, հուսով ենք, որ այս իրադարձությունները կսթափեցնեն կրթության ոլորտի` կոնկրետ այս հարցով զբաղվող մարմիններին: Անհամբեր սպասում ենք ԱԿՆՀԱՅՏ փոփոխությունների:

Կապանը պատրաստվում է Նոր տարվան!

Բարև ձեզ, մեր շատ սիրելի համաքաղաքացիներ: Համոզված ենք,որ բոլորի տրամադրությունը հիմա շա՜տ բարձր է, չէ՞ որ սկսել են տոները.

 Կապանը պատրաստվում է Նոր տարվան:

Քաղաքը հիանալի տեսք ունի, ամբողջովին պատվել է լույսերով:Եղանակն էլ մեր կողմից է և բարենպաստ պայմաններ է ստեղծում:

Առևտրի սրահներում եռուզեռ է. բոլորը ցանկանում են Նոր տարին նոր իրերով դիմավորել: Այդպիսի վիճակ է նաև մթերքի խանութներում:

 Ամեն տեղ մեծ թվով ակցիաներ են, որոնք ավելի են ոգևորում անհանգիստ բնակչությանը: Անկասկած, եթե այսպես շարունակվի, խանութպաններին եկամտաբեր տարի է սպասվում:

 

Մշակութային կյանքը նույնպես շատ աշխույժ է: Մշակույթի կենտրոնում կազմակերպված համերգները հաջորդում են մեկը մյուսին: 

Երաժշտական և պարային խմբերը ներկայացնում են իրենց նոր համարները: Սիրելի երգիչների հետ բեմում պարում են նաև Ձմեռ պապն ու Ձյունանուշը:

Տոնական ներկայացումներ են սկսվել Ալ. Շիրվանզադեի անվան թատրոնում: Բոլոր ծնողներին առաջարկում ենք երեխաների հետ անպայման այցելել և որոշ ժամանակ իրենց զգալ հեքիաթում:

Մի խոսքով, եկե՛ք վայելենք միշտ այսքա՜ն հաճելի ու երջանիկ օրերը: Բարի ժամանց!

Բարի գալուստ ձմեռ…

…Ձմեռը մտնում է քաղաք

Մարդկային սրտերի միջով,

Մարդկային սրտերի միջից

Ձմեռը մտնում է քաղաք…

Սիրելինե՛րս, ահա և ժամանեց մեր ճերմակաթույր ձմեռը: Նա շա՜տ էր ուզում խլել մեզնից աշունը, և անընդհատ ձյուն էր ուղարկում: Սիրելի՛ ձմեռ, հիմա հանգիստ կարող ես ձյունել, հերթը քոնն է: Անհամբեր սպասում ենք, թե երբ վերջապես կկարողանանք ձնագնդիկ խաղալ…)))

Կապանում միշտ էլ գեղեցիկ էր ձմեռը և այս տարի, հուսանք,նորից գեղեցիկ կլինի

…Ձմեռն աղքատ է,

Տխուր է երգում

Այն բանի համար,

Որ մի գույնով է

Իր տունը ներկում…

Բայց չէ՞ որ նա յուրօրինակ է հենց այն բանով, որ ամեն ինչ մի գույնով է օծում: Եվ միայն մեզնից է կախված՝ ինչպիսին կլինի նա՝ ուրա՞խ, թե՞ տխուր:Այնպես որ եկե՛ք դարձնենք ձմեռը երջանիկ տոն, չէ՞ որ բոլոր գեղեցիկ տոները հենց ձմռանն են լինում:

Բարի գալուստ ձմեռ…!!!

Ու՞ր է կորել մաքրասիրությունը....

Հարգելի՛ համաքաղաքացիներ, թույլ տվեք խոսել մի երևույթի մասին, որը համարվում է մեր թերություններից մեկը:

Մենք ապրում ենք մի փոքրիկ քաղաքում: Այն գեղեցիկ է, բայց կան շատ երևույթներ, որոնք քողարկում են այդ գեղեցկությունը: Դրանցից մեկը, ցավոք,մաքրասիրության բացակայությունն է:

Ամբողջ քաղաքում կան աղբարկղեր, որոնց մեծ մասը գրեթե միշտ դատարկ են լինում: Եվ ինչի՞ մասին է դա վկայում. աղբը նետվում է ոչ համապատասխան վայրեր:

Հատկապես ապշեցուցիչ է այն, որ աղբի մնացորդները նետում են աղբարկղերից մի քանի քայլ հեռավորության վրա: Ուղղակի անհասկանալի է՝ ի՞նչն է պատճառը:

Երևի պատճառն այն է, որ մենք ամեն ինչ բարդում ենք մեկս մյուսի վրա և չունենք սեփական պատասխանատվության զգացում: Շրջապատի մաքրությունը յուրաքանչյուր մարդու բարոյական պարտականությունն է: Եվ ուրիշ ո՞վ պետք է մտածի մեր միջավայրի մասին, եթե ոչ մենք:

Եկե՛ք ընդգծենք մեր քաղաքի գեղեցկությունը, այլ ո՛չ թե փակենք այն մութ շղարշով: Մաքուր պահե՛նք մեր քաղաքը, որպեսզի կարողանանք բարձր պահել մեր գլուխները: Հետևե՛նք միջավայրի մաքրությանը, որպեսզի ինքներս մեր մեջ դաստիարակենք 
մաքրասեր հասարակություն: